沖繩旅遊 - 行程使費

日本，係香港人嘅鄉下，唔少香港人去旅行首選嘅地方之一。而沖繩，更加係日本內嘅旅遊熱點之一，咁貴為旅遊區中嘅旅遊區，大致使費要幾錢先為合理，幾錢係貴，今日就分享吓。

一般沖繩有幾個peak season係特別貴，eg. 6 – 8月
除咗以上日子外，沖繩旅行唔算貴，以下會用一家三口做例子

機票費用:

由香港直航到沖繩通常得兩間航空公司選擇 – Hk airline & Hk Express

Hk airline

港航，飛沖繩有每日有兩班 – HX682 & HX658

HX682 07:25 > 11:00
HX682屬於早機，起飛時間係07:25 預定到達沖繩時間係11:00。
05:00就要到達機場，但好處係飛到沖繩先11:00，拎埋行李、過埋關，拎埋車，去埋酒店check in都仲有大半日時間玩，但如果有小朋友就相當辛苦，屋企附近冇NA車要call車嘅話又要另外一筆使費，所以有好有唔好。

HX658 11:30 > 15:00
HX658屬於中午機，起飛時間係11:30 預定到達沖繩時間係15:00
只需09:00到達機場，起身時間同交通情況都比較舒服，但到沖繩時間都已經15:00，拎埋行李、過埋關、拎埋車，亦都已經入夜，去到酒店基本上就已經一日，所以就自己取捨。

順帶一提，雖然港航並非廉航，航班上都設有獨立電視、飛機餐、飲品。但疫情後嘅HX682 & HX658上嘅電視機只係裝潢品，飛機餐亦只有一個包，飲品方面尚有啤酒、house wine、一般soft drink等可供選擇。
PS. 如果落機後就要租車嘅話，請勿飲用酒精類飲品。

HKexpress

香港快運，屬於廉航，一般飛沖繩每日只有一班 – UO820同另一班不定時嘅UO824

UO820 07:35 > 11:05
UO820 同HX682一樣屬於早機，起飛時間係07:35 預定到達沖繩時間係11:05。
同樣要05:00就要到達機場，基本上同HX682時間上冇乜分別，唯獨登機閘口可能會遍遠少少，所以要預留時間去閘口。

UO824 15:50 > 19:20
UO824就係中午機，起飛時間係15:50 預定到達沖繩時間係19:20。
UO824唔係每一日都有機，喺旅遊旺季會逢星期二、四、六出現。好處係可以喺屋企他他條條食埋個brunch去先機場，如果係玩快閃嘅，更加可以請半日假就可以下午即出發。但因為到沖繩都已經入夜，拎埋行李、過埋關都過晒晚飯時間，一般租車公司都已經關門、的士都可能已經到咗收深宵附加費嘅時間，所以要留意交通情況。

以上四班去程航班，唔包寄倉行李一般大概價錢約在HKD$750 ~ HKD$1,200內，至於回程航班有:

Hk airline:

港航回程航空有兩班，分別係:HX681 & HX657

HX681 12:00 > 13:55
HX681 屬於中午機，起飛時間係12:00 預定到達香港時間係13:55
HX681好處係返到香港先下午兩點，唔駛等的士嘅同時，更有足夠時間返屋企執行李，但因為起飛時間係12:00，所以最遲要10:00在那霸機場，加上最後一日又要CHECK OUT又可能要還車，加上果段時間嘅機場安檢係非常非常多人，所以等同於當日一整日就冇咗。

HX657 16:00 > 17:50
HX657屬於中午機，起飛時間係16:00預定到達香港時間係17:50
同樣屬於中午機嘅HX657就唔同喇，因為16:00先起飛，14:00前到機場都有足夠時間，可以慢慢喺酒店check out之後，寄存行李喺酒店或者先到機場寄存喺行李托管店都得，如果係單軌線，站內都有locker可以寄存。返到香港時間都係17:50，仲有大把時間執行李，比較舒服。

HKexpress:

UO821 12:00 > 13:55
UO821屬於中午機，起飛時間係12:00 預定到達香港時間係13:55
基本上同HX681係冇分別，只係分別在港航定係快運。當然，港航會設有飛機餐(都係個包…)同埋飲品提供，所以可以按自己所需要去決定。

住宿費用:

住宿永遠都係豐儉由人，平可以平到住太空艙，貴可以貴到去住酒店。不過一般而言，比較支持住airbnb等民宿。因為沖繩超市內賣嘅食物太吸引，無論係和牛打邊爐、亞古豬嘅燒肉、甚至一般嘅壽司拼盤，都會想令人想買返去食一餐。而一般民宿都會提供到如爐頭、煲、碗碟等廚房用具，咁就可以滿足到喺超市購物嘅慾望。
一般airbnb一晚價錢大概: ¥10,000 - ¥15,000(那霸市)

當然，嚟到日本，如果有得浸溫泉就更好。而沖繩亦都有多間天然溫泉酒店可供選擇，但價錢上就一般比較貴，價錢大概為一晚: ¥30,000 ~ ¥40,000

交通費用:

上次講過，喺沖繩就算公共交通工具都唔平，如果落腳點係那霸附近的話，除非只玩單軌線，否則每一日交通費約需¥5,000，如果有需要乘坐的士的話會更貴，加上沖繩的士日文普遍都溝通唔到。而租架五人車價錢都係落喺¥6,000 ~ 8,000左右，所以一般都建議自駕遊會比較化算。
*租車記住搵O.Rent

餐食費用:

當大家離開香港之後，就會發覺依個世界原來食野係咁平。
一般而言:
拉麵 ¥ 900 ~ 1,100
壽司 ¥ 3,000 ~ 5,000
火鍋 ¥ 3,000 ~ 5,000
燒肉 ¥ 3,000 ~ 5,000
串燒 ¥ 2,000 ~ 3,000
鐵板燒 ¥ 3,000 ~ 5,000
海鮮市場 ¥ 3,000 ~ 5,000

*並以每個成年人計算 (酒精類飲品未計算在內)

當然，沖繩一樣有天價海鮮、A5級和牛、高級餐廳服務。所以以上價錢只供參考。

玩樂費用:

沖繩可以玩嘅野就多囉，好動嘅有: 高卡車、越野車、孖寶賽車、滑翔傘、飛索、騎馬、潛水等
文靜嘅有: 吹玻璃杯、餵動物、參觀景點、主題公園、名勝、城跡、夾公仔等

以上活動平可以平到免費，貴可以貴至¥ 30,000~40,000，所以睇自己budget安排活動吧。