沖繩旅遊 - 單軌鐵路&巴士攻略
作為旅遊熱點嘅沖繩，自駕遊係必然選擇，但如果想旅程中感受一下當地風土人情，搭公共交通工具不失一個好方法。所以今次分享吓關於沖繩公共交通工具嘅玩法。
沖繩公共交通主要係由單軌鐵路配合公共巴士組成
- 單軌鐵路
車票主要分4款
- QR 單程票喺自動售票機可以買到，而售價機更有多國語言如: 英文、中文等選擇，所以使用唔困難，而車資可參考售票機上面個路線圖，對應返目的地購票就得，留意返未滿12歲嘅小童半價，未滿6歲嘅小童由成人陪同下，可以免費(上限兩個)。
之後將車票上QR code部份對準閘口嘅scanner入閘，出閘同樣咁做，出閘後有個紅色嘅棄置箱，可以將用完嘅票放落去，或留為紀念都得。
QR 全日票
分為一日同兩日票兩款，一日票售票為¥800，兩日票就¥1,400 (小童半價)。同樣可以喺自動售票機買到，喺買後24/48小時後可以無限次使用。使用方法同單程票一樣。因為單軌鐵路單程都唔平，所以如果決定玩那霸市嘅話，買全日票不失為一個好選擇。
IC card
現時可用嘅ic card有okica同suica等。okica同樣可以喺售票機買到，買時會問要儲值幾多(其中¥500為按金)。使用方法同八達通一樣，退卡時同樣可以連按金退，如果10年內唔用就將會失效。
Bus-monorail pass
日文為 バスモノパス，係一個由那霸市區內線嘅那霸巴士同單軌鐵路聯營嘅pass。買咗之後就可以一天內無限次使用單軌鐵路同那霸市區內線嘅那霸巴士。售價為¥1,000，小童半價。但買到嘅地方就無咁方便，要喺リウボウ旅行サロン店先買到。
買完之後會獲得一張好似bingo card嘅野，之後對應返你想用嘅月份同日子擦，入閘時俾職員望就得。
其他仲有如:定期車票、團體車票、特殊車票等。因為依啲主要唔係for遊客，所以依度唔一一介紹了。
單軌鐵路站內全部都設有洗手間同lift，所以唔擔心行李上落唔方便。而閘內同香港輕鐵差唔多，同樣全面禁煙，亦嚴禁插隊。當列車到站時，請先讓乘客下車後依序上車。
車廂內同樣有關愛座，亦都同樣係批鬥座。不過有幾點同香港唔同嘅:
車內唔可以講電話，包括用語音功能，因為會對其他乘客造成困擾。
全部電子用品都要靜音。
背囊要向前孭，或放喺架上，以免影響其他人。
扶手電梯要企定，唔可以行走。
攜帶大型行李請使用的士或本公司嘅搬運服務。
雖然犯咗以上嘅都無罰則，但會遭人白眼，為咗唔好失禮人，都係入鄉隨俗好啲
- 公共巴士
巴士有分市內線、市外線兩款
- 市內線
市內線係指巴士班號 1~19號，除咗7、8、18號以外嘅巴士線。
市內線係劃一收費，成人¥240，小童半價，要上車時先俾錢，亦接受okica，但suica 就只有部份巴士接受。用現金亦得，無散紙可以利用車上嘅兌換機打散，上限¥1,000。如果係買咗bus-monorail pass，就記住上車show俾司機睇。
落車同香港一樣，按鐘等停定就可以落車。
市外線
市外線嘅乘搭方式同市內線完全唔同，上車時先要拍ic card或喺前門拎「整理劵」，整理卷上面有個數字，代表你喺邊區段上車，然後落車時要根據車資顯示器黎對返上車區段嘅車資，車資連同整理劵一齊放入「運賃」畀錢。同樣，無散紙的話可以用兌換機打散。用ic card的話，到目的地後拍卡就得，如果卡內唔夠錢，可以車上即場增值。
但留意返，bus monorail pass係不適用於市外線。
喺沖繩要搭公共巴士有幾點一定要識
時刻表
Ps. 時刻表個時間只有能參考用，喺沖繩早到或遲到5-10分鐘係好平常嘅事，所以唔好計到咁盡。
先讓乘客落車，然後上車
雖然沖繩巴士，有前門同後門，但因為要落車付費嘅關係，所以後門一般係唔會開放。就會出現同時前門上落客嘅情況。
但沖繩係必須先讓乘客落車，然後先可以上車，所以嚟到沖繩唔駛心急，慢慢等無人落先上車吧。
盡量唔同陌生人同座
除咗返工放工時間真係好迫無位企嘅情況外，絕大多數時間沖繩人都唔會同陌生人同座，就算會，都會講一大輪唔好意思、打擾哂等。但我哋作為旅客，都唔好因為知無人坐而去過份霸佔空間，面斥不雅。
到站提示
沖繩人一般都唔趕時間，所以唔使心急，要停定先好起身同畀錢。
另外，因為除咗高速線同利木津巴士有設有行李艙之外，其他都需要將行李擺入車廂內。如果攜帶大型行李嘅話，請使用的士或本公司嘅搬運服務。
最後，除非只係玩市內，否則沖繩車費都相當貴，打個比喻一家三口從那霸坐yanburu急行バス去美麗海水族館，單程就已經要¥5,000，如果無車牌的話，不妨搵我哋傾傾。
PS. 去沖繩的話，記得搵我哋租車
#沖繩旅遊
#沖繩
#自駕遊
#香港人
#Okinawa
#o_rentkuruma
FB: 老hike都移民
留言
張貼留言