沖繩分享 - 水土不服
早前，有一家香港客戶幫襯O.Rent時，喺旅程嘅第一日，該家庭嘅一位小朋友不停痾嘔，令家人非常擔心。經診斷後發現原來係「水土不服」引起嘅不適。
水土不服成因好多，可能因氣候變化影響、可能因飲食習慣影響，不過更常見係因水嘅軟硬度影響。
水嘅軟硬度係受礦物質濃度影響。當水係來自雪山、高山、地下等地方，水中含有嘅礦物質濃度會較高，水就會比較硬。相反來自江水嘅礦物質含量低，水就會變得軟。
世界衛生組織(WHO)會以水中嘅鈣(Calcium)同鎂(Magnesium)嘅每公升含量作為水硬度嘅單位，大致分4個級別
- 軟水 – 0-60mg /L
- 稍硬水 – 0-120mg /L
- 硬水 – 120-180mg /L
- 極硬水 – 181mg/L 以上
水硬度越高，水嘅味道越獨特，不過長期飲用嘅話，礦物質有機會喺身體裡面沉積，會引起結石問題。除咗飲用方面，硬水仲會令洗手盆、浴缸、便廁等用品發黃、容易破壞衣服纖維，甚至礙塞去水喉。
相反軟水呢，因為軟水含較少刺激性礦物貨，所以對皮膚比較好。同時軟水比較容易令番梘液起泡，對洗衫、洗碗、洗頭髮等都會比較乾淨。同埋軟水含嘅礦物質較低，煮飯同埋沖茶都唔會破壞原味，會比較香。但水太軟都唔係好事，因為會令身體缺乏某啲礦物質，長期落去都係會影響健康。
根據水務署資料，香港水質平均值係40mg/L，所以係屬於軟水，但沖繩地質屬琉球石灰岩，而沖繩係使用地下水、水霸水及混合水，所以一般嘅水質會偏硬，平均值係84mg/L左右。但唔同地區會因為淨水場、水嘅來源等出現極大偏差，喺沖繩北島係錄得141~209mg/L嘅極硬水記錄。
一般而言，硬水對人體係無害，但當初嘗硬水的話，身體係需要時間適應，而過程中會造成腸胃功能紊亂，就係所謂嘅「水土不服」。不過又唔駛擔心，因為超市及便利店等一般都會有軟水或蒸餾水出售。如果擔心自己或家人腸胃不適，建議都係飲用返軟水吧。
留言
張貼留言