自駕遊分享 – 保險計劃

黎到沖繩租車，除咗要揀車款之外，保險都係不可或缺嘅事。曾經有個故事係，有人一個旅程炒三次車，但保險都照賠，同樣地，都有聽過有人買咗最高級嘅全保，但最後都係要自己負責。究竟全保係咪就係全部都保呢？今次就分享下租車公司所提供嘅保險計劃

一般而言，喺沖繩開租車公司，法律規定咗必須要全部車都加入「強制保險」，強制保險大致上分開三部份：

• 第三者責任保

固名意義，保障司機、乘客以外嘅第三者。當車輛因保單保障範圍以內嘅意外，導致第三方嘅身體受傷、死亡或財產損失，均會由第三者責任保險賠償。

保障範圍: 因保單條款內所引起的意外導致到第三方嘅醫療、財物損失。

• 車輛損害保障

當發生喺保單保障範圍以內嘅車輛損害，例如：行車時遭外來物擊中、同其他車輛發生碰撞、泊車時刮花等，均可向保險索償。

保障範圍: 因保單條款內所引起的意外導致車輛損壞。

• 人身傷害保障

當在保障範圍內發生嘅意外導致司機、乘客及受害者受傷或死亡時，保險公司就會向傷者賠償醫療費用、精神慰撫金、預期收入損失、葬禮費等。

保障範圍: 因保單條款內所引起的意外導致司機、乘客及受害者等受傷或死亡。

以上三項均屬強制保險嘅項目，一般強制保險都會設有賠償上限，當一超過賠償上限時，肇事司機有可能需要支付額外賠償。除此之外，一般強制保險都會有「免責額」，即係香港嘅自負額、墊底費，一般¥ 50,000 ~ 100,000不等。為咗填補依個空缺，所以就會有「免責補償制度」出現。

• 免責補償制度 CDW

Collision Damage Wavier 簡寫為CDW，一般屬自選項目，主要作用係保障當強制保險需要賠償時所產生嘅自負額時，自負額將由承保公司負責，達致0自負額。

除咗對人、對車、對第三者外，一般根據租車契約，當租客發生意外後，仲要賠償租車公司因維修車輛而導致不能出租嘅「營業損失」。喺依方面，就有另一個保險「營業損失賠償」。

• 營業損失賠償 NOC
  

Non-Operation Charge簡寫為NOC，一般屬自選項目。主要作為就係保障當租車期間發生意外，導致車輛損壞後，需向租車公司賠償營業損失時，該損失將由承保公司負責。

而租車公司選購保險時，除咗要選購強制保險外，亦可以加選其他保障提供俾客戶，例如:

• 輪胎保障

因意外導致需要維修或更換輪胎後，可向承保公司索償。

• 道路救援服務

因意外落坑需要吊車救援
因忘記熄匙後電池燒乾後，需要緊急救助重啟
因車匙反鎖喺車內，需要開鎖等

• 擋風玻璃保障

因意外導致車頭擋風玻璃損傷，可向承保公司索償。

一般自駕，都會建議大家用最高級別嘅保險，再加上CDW、NOC，以防止發生意外時，需要自己賠償。但，並唔係買晒最高級別就可以任撞，因為有「不保事項」

不保事項根據唔同嘅租車條款而有所唔同，一般大致嘅有

• 發生事故後，沒留停原位報警或通知租車公司

請留意，喺保險條款上，並唔係任何意外都需要報警，但至於咩情況需要，咩情況唔需要，唔能夠一概而論，所以詳情必要向租車公司查詢，如果搵唔到租車公司，亦要停留原地致電行車手冊上嘅保險公司電話，問清楚現時情況需唔需要報警。保險公司一般都會提供24小時及中文、英文等支援。
至於最多人問，點解一定要報警。理由係，如果該意外引致第三者財物損失，警方係需要過黎評估：

1. 肇事司機係咪租車契約車上本人
2. 肇事司機有冇酒駕、藥駕
3. 路道上有冇任何油污、雜物、或不可預見嘅事情導致意外發生
4. 車輛上機件有冇任何問題導致意外發生等

亦將事件發生經過、時間記錄並報告俾保險公司。
就算該次意外屬於唔需要報告嘅情況下，亦要報告俾租車公司，因為租車公司都需要根據時間、意外詳情等記錄並提交索償。
緊記不論任何理由無停留原地、無通知租車或保險公司，100%不保。

• 違反日本道路交通法

例如: 衝紅燈、超速、違泊、等無跟從指示嘅行為而引起嘅交通意外等。100%不保。另外，日本道路交通法係寫明，行車時唔可以使用手機，包括handfree都唔得。所以因使用、注視手機等行為，都係不保。

• 人為操作不當引起
• 行車時唔專心駕駛引起嘅意外
• 開車門時無注意距離導致嘅損毀
• 喺行車道以外地方駕駛時引起嘅意外等

均屬不保事項

其他如
自行調解、登記司機以外人駕駛、無通知下超過租用時間、入錯油等都係不保。

講咗咁耐不保，咁究竟有咩情況之下係會受保呢

• 因機械故障所引起

例如: 煞車失靈、方向盤失靈等引起嘅意外。

• 因不可預見嘅事引起

例如: 避動物、石仔、油污、雜物、天雨等事導致嘅意外

• 其他

在切線時，對車無留意下產生碰撞做成嘅損壞。
在十字路口轉灣時，無留意優先車輛所產生嘅損壞。
喺自己行車線內，同其他物件如鐵枝、樹枝等碰撞所產生嘅損毀。
行駛時，有行人衝出馬路，收制不及所產生嘅損毀。
等等

全保，亦非全部都保。全保只係代表喺保障範圍而內所發生嘅意外時，可獲得全額賠償。所以買咗全保唔代表可以唔小心駕駛，出意外一樣有機會要自己負責。

PS. 去沖繩的話，記得搵我哋租車 

#沖繩旅遊 
#沖繩
#自駕遊
#香港人
#Okinawa
#o_rentkuruma
FB: 老hike都移民