自駕遊分享 - 車款選擇

沖繩，一個唔單止香港、台灣人鍾意去，仲係連日本本島人都好鍾意去嘅地方。所以去沖繩旅行，除非唔打算自駕遊，否則一買到機票之後，唔單止要即刻book酒店，仲要即刻去book車，但如果對車款唔係咁熟悉嘅話，面對成百款車，究竟點揀先適合自己呢？

• 人數

人數係一個不可抗力嘅因素，因為係冇可能7個人租架5人車。同時同行者體形、會唔會有小朋友等都係一啲關鍵因素，根據日本交通法例，6歲以下兒童係必須使用car seat，所以佔用座位空間同成人冇分別，甚至可能更多。另外同行者體形亦都係一個大問題，因為如果係選用5人車，後排坐3個人，坐中間果個肥少少都相當辛苦，同樣情況一樣會出現喺7人車及8人車上面，所以人數係唔可以預到啱啱好。

• 行李數

好多人租車都會重視人數，而忽略行李數量，除非係打算第一日同最後一日都唔需要租車，同時途中又冇換酒店/民宿等計劃，如果唔係，行李係租車嘅一大問題。
打個打喻，一家四口，兩個28吋行李箱，只需要租一架普通5人車如: Honda Fit、Toyota Aqua、Toyota Yaris、Nissan Note等都已經ok
但如果係兩對情侶，兩個28吋行李箱再加2個7kg呢，以上車款已經做唔到。
所以行李數量係一個重點問題。

加上人數問題，大概可以以下圖表去考慮車款

3人+2件28吋或同等size行李 : Aqua / Fit等同款5人車
4人+3件28吋或同等size行李 : Raize 等同款SUV
4人+4件28吋或同等size行李 : Sienta等同款MPV
5人+5件28吋或同等size行李 : Noah等同款MPV
6人+5件28吋或同等size行李 : Alphard等同款MPV
7人+5件28吋或同等size行李 : Alphard 8人等同款MPV
8人或以上，如持有國際牌D類牌照，即係香港嘅小巴牌，可以租用10人Hiace。如冇一論建議分兩架車。

當然，仲有另一個選擇係選用行李托運服務，托運公司會將行李收集後直接送到去酒店或民宿，但都會視乎地點、行李數量去收費，如果只係那霸市內，大概每個28吋行李箱¥1,100左右。

• CC

全寫為cubic centimeters，即係引擎嘅排氣量，依度唔係指引擎排出嘅氣量，其實係指引擎氣缸嘅空間容量。雖然CC同馬力冇直接關係，但同車嘅負重表現就有正面關係。畢竟自駕遊太多數時間都會坐滿人，甚至加埋行李Full loading出發。如果車款負重表現差，唔單止上斜時更加會顯得無力，甚至會影響駕駛感。所以要留意車款CC大小。

• 純油車/混能車
  

混能車 – Hybird，即係將傳統嘅汽油車裝上電池同磨打，可以將動力回收做返電力去推動汽車，大大減低油消耗。因為大多租車公司都需要還車時去指定地點將油入滿，雖然日本油價比香港平，但一般汽油車比混能車油耗多大概50-60%，依條數都會影響旅費。唔單止咁，混能車起步時因為行電嘅關係，比傳統純油車反應快同埋冇咗貼身感，小朋友會坐得舒服啲，行駛時又比純油車靜，再加上比較環保，所以可以喺揀車時考慮埋類型。

• 車身大細

揀選適合今次旅程嘅車款後，如果駕駛經驗不足者，必須留意車身長度。因為唔同嘅車長，所產生嘅「內輪差」都會唔同。如果冇揸開大車，而走去租用Alphard嘅話，相信有好大機會拉花，甚至出現嚴重交通事故。安全第一，選用適合自己駕駛嘅車款

• 車款保險
  

一般日本租車公司保險分3個部份

1. 保險補償制度
   根據日本法例，要行駛嘅車輛都必須加入保險補償制度(即係強制保險)，保障範圍包含以下幾項:
   
   第三者責任保
   同香港三保一樣，冇三保係唔可以行駛，所以一定會有三保。
   保障範圍: 因意外導致到第三方嘅醫療、財物損失。
   
   車輛損害
   類似香港全保，不過大多數有自負額同有好多不保事項，所以要了解清楚。
   保障範圍: 因汽車事故導致車身受損。
   
   人身傷害
   依點係保障司機及乘客。
   保障範圍: 因汽車事故導致司機或乘客受傷、甚至死亡時，保險公司就會按保險條款而去賠償。
   
   
2. CDW 補償制度保險
   全寫Collision Damage Waiver。當發生交通事故時，先會租車公司先按強制保險去賠償，但因為強制保險有自負額或有不足嘅地方，所以就可以加上CDW去填補。但CDW都唔係無敵，如果犯上一啲如: 醉駕、藥駕、發生事故無報警等情況下，一樣有機會唔賠。
   
   
3. NOC 營業損失賠償
   全寫Non-Operation Charge。自駕遊發生交通事故時，除咗要負責自己車輛上面嘅損失外，仲需要賠償租車公司因為車輪維修而不能出租所產生嘅營業損失。依家好多租車公司都有提供免除NOC嘅保險項目，所以可以問清楚有冇依個選項。

因為唔同車款嘅保險保險價格都唔一樣，所以一定要了解清楚保險費用。

• Car Cam

之前講過，沖繩馬路上充斥住大量外國自駕遊駕駛者，當中有部份駕駛態度相當麻麻，Car Cam係喺交通事故時，保障自己清白。

• 倒車Cam
  

倒車cam係方便大家倒車時望清楚後面會唔會有人經過同埋提示同距離，雖然考牌時大家都學過點用側鏡泊，但以防萬一，最好都選有配備嘅車款。

• Blue Tooth

藍芽除咗方便大家將手機上嘅music player連接喺車之外，仲可以將手機上嘅Google map / Apple map等語音導航連接上車，等大家可以專心揸車又唔怕望漏咗個GPS而miss咗路口。

• 手機架
  

雖然一般日本租車都會配備上GPS，但一黎位置唔係咁好望，二黎MAP CODE使用有難度，所以大多數都建議大家用返手機上嘅goolge map / Apple map等手機導航，所以如果冇手機架，就會好唔方便，另外留意仲有USB叉電，因為手機導航都相當吃電。

• 車用充電器

上面提過，因為手機GPS都相當食電，車上面冇車用充電器或USB插頭嘅話，就會相當唔方便，如果車輛上面冇提供，唯有拎多幾個Power Bank喇。

• ETC Card
  

其實張ETC Card係一張Credit Card，所以租車時，未必會有跟車。一般租車公司都會有ETC Card租用依個option俾大家去加嘅，不過如果用喺沖繩，本店認為唔用好啲。一黎Route 58風景比IC靚，二黎IC唔係快Router 58好多，最多都係差30mins左右，如果到時真係想追時間而要行IC嘅話，比現金都好方便。不過如果唔差果幾千円嘅話，租埋都無壞。

• 冷氣強度

依點係非常、極度重要！！Even 租車嘅日子係冬季都好，沖繩中午個太陽真係唔講得笑！當上車後先發覺冷氣唔夠嘅話，到時就後悔莫及，所以必須要檢查清楚依點。

其他Gimmick有: Keyless、中文介面、紙巾、雨傘等都可以按自己喜好而去挑選。

最後，最緊要有個好嘅客戶服務提供，咁以上各點都可以直接俾客服處理，等大家唔駛為車款而頭痕，可以專心計劃行程。

PS. 去沖繩的話，記得搵我哋租車  #沖繩旅遊 
#沖繩
#自駕遊
#香港人
 #Okinawa
#o_rentkuruma
FB: 老hike都移民